कैलाली : यातायात व्यवस्था कार्यालय धनगढी ले सवारी चालक अनुमति पत्र (लाइसेन्स) वितरण कार्य सुरु गरेको छ।
कार्यालयका सूचना अधिकारी सुरेश ओखेडाका अनुसार आजबाट उक्त सेवा पुनः सञ्चालनमा आएको हो। यातायात व्यवस्था विभागले धनगढी कार्यालयलाई प्रिन्ट गरिएको ३१ हजार ७८० जनाको लाइसेन्स पठाएको उनले जानकारी दिए।
उनका अनुसार २०७८ साल पुसदेखि २०८१ साल चैतसम्मका ३१ हजार ५८५ जना तथा २०८३ साल वैशाख ४ गतेदेखि वैशाख ७ गतेसम्म ट्रायल पास गरेका १९५ जनाको लाइसेन्स कार्यालयमा प्राप्त भएको छ।
कार्यालयले सेवाग्राहीलाई राजश्व बुझाएको भौचर वा निस्सासहित कार्यालयमा उपस्थित भई लाइसेन्स बुझ्न आग्रह गरेको छ। साथै, लाइसेन्स कार्यालयमा पुगे/नपुगेको जानकारी लिन कार्यालयको फेसबुक पेज जाँच गरेर मात्रै आउन अनुरोध गरिएको छ।
सरकारले गत चैत महिनामा ट्रायल पास गरेको २४ घण्टाभित्रै सवारी चालक अनुमति पत्र प्रिन्ट गरी वितरण गर्ने घोषणा गरेको थियो। सोही निर्णयअनुसार अहिले विभिन्न कार्यालयमार्फत धमाधम लाइसेन्स वितरण भइरहेको छ। लामो समयपछि लाइसेन्स पाउँदा सेवाग्राहीहरू पनि उत्साहित भएका छन्।
