बैतडी : बैतडीमा पोसिलो खानाको अभावका कारण वडैपिच्छे कडा कुपोषित बालबालिका भेटिन थालेका छन् । वैशाख १५ गतेदेखि सुरु भएको राष्ट्रिय पोषण लेखाजोखा अभियानको पाँच दिनमै जिल्लाभर १५२ जना कुपोषित बालबालिका फेला परेका छन् । तीमध्ये १९ जना कडा कुपोषणबाट ग्रसित बालबालिकालाई उपचारको दायरामा ल्याइएको स्वास्थ्य कार्यालयले जनाएको छ ।
स्वास्थ्य कार्यालयका सूचना अधिकारी खगेन्द्र कार्कीका अनुसार वैशाख १५ देखि ३० गतेसम्म सञ्चालन हुने अभियानमार्फत छ महिनादेखि पाँच वर्षमुनिका करिब २२ हजार बालबालिकाको स्वास्थ्य परीक्षण गरिनेछ ।
सिगास गाउँपालिका–२ गाँजरीमा मात्रै चार जना कडा कुपोषित बालबालिका भेटिएको स्वास्थ्य चौकी इन्चार्ज जनकसिंह धामीले जानकारी दिनुभयो । उहाँका अनुसार ती बालबालिकालाई उपचारसँगै पोषिलो खाना उपलब्ध गराउने काम सुरु गरिएको छ । सिगास गाउँपालिका देशकै अत्यधिक गरिब स्थानीय तहमध्ये एक मानिन्छ, जहाँ गरिबी दर ६६ प्रतिशतभन्दा बढी रहेको तथ्याङ्क छ ।
स्वास्थ्य कार्यालयका अनुसार गरिबी, खाद्य असुरक्षा र चेतनाको कमीका कारण कुपोषणको समस्या बढ्दो अवस्थामा छ । सूचना अधिकारी कार्कीले पाँच दिनमै १५२ जना कुपोषित बालबालिका भेटिनु “डरलाग्दो अवस्था” भएको बताउनुभयो । उहाँका अनुसार कुपोषित बालबालिकामा उमेरअनुसार उचाइ र तौल कम हुने तथा ख्याउटे अनुहार देखिने समस्या बढी पाइन्छ ।
अभियानले जातीय आधारमा समेत कुपोषणको अवस्था अध्ययन गरिरहेको छ । हालसम्म भेटिएका कुपोषित बालबालिकामध्ये ३७ प्रतिशत दलित समुदायका रहेको तथ्याङ्कले देखाएको छ ।
गत वर्ष जिल्लामा एक हजार ९३४ जना कुपोषित बालबालिका रहेको तथ्याङ्क थियो । तीमध्ये ३१२ जना कडा कुपोषित बालबालिकाले स्वास्थ्य संस्थाबाट उपचार पाएका थिए ।
स्वास्थ्य कार्यालय प्रमुख तीर्थराज भट्टले अभियान सञ्चालन मात्रले समस्या समाधान नहुने बताउँदै गरिबी न्यूनीकरण र सबैले पोसिलो खाना पाउने वातावरण निर्माण गर्नुपर्नेमा जोड दिनुभयो । उहाँले पोषण भत्ता, सुत्केरी भत्ता तथा स्थानीय तहका पोषण कार्यक्रम प्रभावकारी बनाउनुपर्ने बताउनुभयो ।
जिल्लाका विभिन्न पालिकाले ‘सुत्केरीको घरमा झन्डा, हातमा अन्डा’ जस्ता कार्यक्रम सञ्चालन गरिरहेका भए पनि स्वास्थ्यकर्मीहरूका अनुसार यस्ता सीमित कार्यक्रमले मात्रै कुपोषण अन्त्य गर्न सम्भव छैन ।
बैतडीमा सन् २०१६ देखि सञ्चालन हुँदै आएको सुआहारा कार्यक्रम हाल बन्द भएको छ । युएसएआईडिको आर्थिक सहयोगमा सञ्चालित उक्त कार्यक्रमले गर्भवती महिला र दुई वर्षमुनिका बालबालिकाको पोषण सुधार गर्ने लक्ष्य राखेको थियो ।
