बैतडी : राष्ट्रिय भिटामिन ‘ए’ कार्यक्रमअन्तर्गत बैतडी जिल्लामा वैशाख ६ र ७ गते बालबालिकालाई भिटामिन ‘ए’ क्याप्सुल तथा जुकाको औषधी खुवाइने भएको छ।
स्वास्थ्य कार्यालय बैतडीका प्रमुख तिर्थराज भट्टका अनुसार जिल्लाभर ६ देखि ५९ महिनासम्मका २२ हजार ७५७ जना बालबालिकालाई भिटामिन ‘ए’ क्याप्सुल खुवाइने कार्यक्रम तय गरिएको छ। साथै, १२ देखि ५९ महिनासम्मका २० हजार ४८३ जना बालबालिकालाई जुकाको औषधी खुवाइनेछ।
कार्यक्रमलाई प्रभावकारी र सफल बनाउन जिल्लाभर ८३१ जना महिला स्वास्थ्य स्वयंसेविकालाई परिचालन गरिएको स्वास्थ्य कार्यालयले जनाएको छ।
बालबालिकामा कुपोषण न्यूनीकरण तथा रोगप्रतिरोधात्मक क्षमता वृद्धि गर्ने उद्देश्यले सञ्चालन गरिने यस कार्यक्रमलाई स्वास्थ्यकर्मीहरूले महत्वपूर्ण जनस्वास्थ्य अभियानका रूपमा लिएका छन्। अभिभावकहरूलाई आफ्ना बालबालिकालाई नजिकको वितरण केन्द्रमा लगेर क्याप्सुल र औषधी खुवाउन आग्रह गरिएको छ।
