कञ्चनपुर : वर्षौंदेखि निर्माणाधीन अवस्थामा अलपत्र परेका कञ्चनपुरका विभिन्न सडक आयोजनाका ठेक्का अन्त्य गर्ने प्रक्रिया सुरु गरिएको छ।
पूर्वाधार विकास कार्यालय र डिभिजन सडक कार्यालय महेन्द्रनगरले लामो समयसम्म काम नगरी बेवास्ता गरिएका सडक योजनामाथि कडा कदम चाल्दै ठेक्का तोड्ने प्रक्रिया अघि बढाएका हुन्। कार्यालयहरूले १५ दिने सार्वजनिक सूचना जारी गर्दै सम्बन्धित निर्माण कम्पनीहरूलाई अन्तिम मौका दिएका छन्।
पूर्वाधार विकास कार्यालय कञ्चनपुरका सूचना अधिकारी लक्ष्मणराज जोशीका अनुसार सार्वजनिक खरिद ऐन २०६३ र सार्वजनिक खरिद नियमावली २०६४ अनुसार २५ वटा सडक योजनाको ठेक्का तोड्ने प्रक्रिया सुरु गरिएको हो। उनका अनुसार पाँचदेखि सात वर्षसम्म अलपत्र रहेका योजनामा काम हुने सम्भावना नदेखिएपछि यस्तो निर्णय लिनुपरेको हो।
आर्थिक वर्ष २०७६/७७ देखि सुरु भएका धेरै सडक आयोजनामा न्यून प्रगति देखिएको छ। निर्माण व्यवसायीहरूको ढिलासुस्तीका कारण स्थानीयवासीले लामो समयदेखि समस्या भोग्दै आएका थिए।
यस्तै, डिभिजन सडक कार्यालय महेन्द्रनगरले पनि आर्थिक वर्ष २०७८/७९ मा सम्झौता भएका तर काम सुरु नभएका वा अलपत्र छाडिएका आयोजनाको ठेक्का तोड्ने प्रक्रिया अघि बढाएको जनाएको छ।
पूर्वपश्चिम राजमार्ग अन्तर्गत अत्तरिया–गड्डाचौकी खण्डमा सडक विस्तार, तथा कैलालीको खुटिया पुल–उर्मा–भडा सडक स्तरोन्नति कार्य समेत प्रभावित बनेका छन्। पटक–पटक ताकेता गर्दा पनि निर्माण कम्पनीले काम अघि नबढाएपछि कारबाही प्रक्रिया सुरु गरिएको हो।
ठेक्का तोडिने सूचीमा अधिकांश ग्रामीण भेगका सडक परेका छन्। ती सडक निर्माण नहुँदा स्थानीय बासिन्दाले दैनिक आवतजावतमा सास्ती खेप्दै आएका छन्। रासस
