कञ्चनपुर : सुदूरपश्चिम प्रदेशका नेपाल–भारत सीमानाकामा सुरक्षा व्यवस्थालाई थप सुदृढ बनाउन सशस्त्र प्रहरी बलले जनशक्ति वृद्धि गर्ने तयारी गरेको छ।
सशस्त्र प्रहरी बल नं. ७ वैद्यनाथ बाहिनीको २५औँ स्थापना दिवसका अवसरमा महानिरीक्षक राजु अर्याल ले सीमा सुरक्षालाई प्राथमिकतामा राख्दै गृह मन्त्रालयको नीतिअनुसार जनशक्ति थप गर्न निर्देशन दिएका हुन्। उनले राष्ट्रिय सुरक्षासँग जोडिएको संवेदनशील विषय भएकाले सबै पक्ष सचेत र एकजुट हुनुपर्नेमा जोड दिए।
उनले भ्रामक सूचना फैलाउने गतिविधि निरुत्साहित गर्दै सीमा सुरक्षा मजबुत बनाउन सबैको साझा जिम्मेवारी रहेको बताए। सशस्त्र प्रहरी बल नं. ७ वैद्यनाथ बाहिनी अत्तरियाका अनुसार कैलाली र कञ्चनपुरका विभिन्न सीमाक्षेत्रमा खटिएका सात गुल्ममार्फत प्रारम्भिक चरणमै १८० जना सशस्त्र प्रहरी कर्मचारी थप गरिनेछ।
बाहिनीका निमित्त बाहिनीपति सशस्त्र प्रहरी वरिष्ठ उपरीक्षक दिग्विजय सुवेदी का अनुसार सीमा क्षेत्रमा हुने अपराध नियन्त्रण, लागुऔषध रोकथाम, अवैध गतिविधि नियन्त्रण तथा राजस्व चुहावट न्यूनीकरणमा सशस्त्र प्रहरी सक्रिय रूपमा परिचालन भइरहेको छ। पछिल्लो समय सीमा क्षेत्रमा २४सैँ घण्टा गस्तीलाई तीव्र बनाइएको पनि उनले जानकारी दिए।
हाल सुदूरपश्चिमका नौ जिल्लामा १९ हजार ६९१ जना विपद् सूचक आबद्ध रहेका छन् भने २६५ जनालाई समुदायस्तरमा विपद् स्वयंसेवक तालिम दिइएको सशस्त्र प्रहरीले जनाएको छ। – रासस
