कैलाली : कैलालीको धनगढी उपमहानगरपालिकाबाट जुवातास खेलिरहेको अवस्थामा ६ जना पक्राउ परेका छन्।
जिल्ला प्रहरी कार्यालय कैलालीका अनुसार धनगढी उपमहानगरपालिका–४ मा डेरा गरी बस्दै आएकी टेक कुमारी गाहामगरको कोठामा जुवातास खेलिरहेको भन्ने गोप्य सूचनाका आधारमा शुक्रबार दिउँसो प्रहरी टोली खटिएको थियो।
प्रहरीले सोही कोठाबाट टेक कुमारी गाहामगरसहित ६ जनालाई नगद २० हजार १४० रुपैयाँ र ३ गड्डी ताससहित पक्राउ गरेको जनाएको छ। घटनाबारे थप अनुसन्धान भइरहेको प्रहरीले जनाएको छ।
त्यसैगरी, कैलालीकै टीकापुर नगरपालिकाबाट लागूऔषधसहित दुई जना युवक पक्राउ परेका छन्।
टीकापुर नगरपालिका–८ अनरुवाबाट ७८० मिलिग्राम खैरो हेरोइनसहित स्थानीय १९ वर्षीय रोहन विक र २० वर्षीय उत्तम साउदलाई शुक्रबार राति प्रहरीले नियन्त्रणमा लिएको हो। प्रहरी चौकी कालाकुण्डाबाट खटिएको टोलीले शंका लागि जाँच गर्दा उनीहरूको साथबाट लागूऔषध फेला पारेको बताइएको छ।
दुवै घटनाबारे प्रहरीले थप अनुसन्धान अघि बढाएको जनाएको छ।
