कैलाली : सुदूरपश्चिमका दुई जिल्ला कैलाली र कञ्चनपुरबाट लागूऔषध खैरो हेरोइनसहित ५ जना पक्राउ परेका छन्।
कैलालीको गोदावरी नगरपालिका–२ बसपार्कबाट ३ सय ७० मिलिग्राम खैरो हेरोइनसहित डोटी शिखर नगरपालिका–२ का २५ वर्षीय कृष्ण दमाईलाई आइतबार बिहान इलाका प्रहरी कार्यालय मालाखेती को टोलीले पक्राउ गरेको छ।
त्यसैगरी लम्कीचुहा नगरपालिका–१ थपालिपुरबाट १ ग्राम १६० मिलिग्राम खैरो हेरोइनसहित ३० वर्षीय प्रकाश शर्मालाई इलाका प्रहरी कार्यालय लम्की बाट खटिएको प्रहरीले आइतबार दिउँसो पक्राउ गरेको छ।
यस्तै भजनी नगरपालिका–३ कुसुमघाटबाट ५ सय ४० मिलिग्राम खैरो हेरोइनसहित जोशिपुर गाउँपालिका–७ का ३० वर्षीय तेजबहादुर मौनीलाई इलाका प्रहरी कार्यालय भजनी को टोलीले पक्राउ गरेको जनाएको छ।
उता कञ्चनपुरको बेलडाँडी गाउँपालिका–३ बनपुरुवाबाट ८ सय ६० मिलिग्राम खैरो हेरोइनसहित २२ वर्षीय सुनिल चौधरी र १८ वर्षीय हसिव चौधरीलाई प्रहरी चौकी भुँडा बाट खटिएको प्रहरीले नियन्त्रणमा लिएको छ।
यसैगरी बेलौरी नगरपालिका–१० दर्सिखल्लाबाट मोटरसाइकल जाँचका क्रममा १० ग्राम ५२० मिलिग्राम खैरो हेरोइनसहित ३२ वर्षीय इश्वर डगौरा र २५ वर्षीय आकाश डगौरालाई इलाका प्रहरी कार्यालय बेलडाँडी को टोलीले आइतबार बेलुका पक्राउ गरेको जनाएको छ।
प्रहरीका अनुसार पक्राउ परेकामाथि आवश्यक अनुसन्धान भइरहेको छ।
