काठमाडौं : नेकपा एकीकृत समाजवादीले सरकारले ल्याएको अध्यादेशको विपक्षमा मतदान गर्ने भएको छ । मंगलबार केन्द्रीय कार्यालय आलोकनगरमा बसेको स्थायी कमिटी बैठकले अध्यादेशको विपक्षमा उभिने निर्णय गरेको प्रचार विभाग प्रमुख एवं उपाध्यक्ष प्रकाश ज्वालाले जानकारी दिए ।
अध्यादेशलाई समर्थन गर्न सकिने अवस्था नभएकाले प्रक्रियामा लगिए विपक्षमा मतदान गर्ने निर्णय गरेको उनले बताए । देशको हितमा नभएकाले अध्यादेश अस्वीकृत गर्नुपर्ने निष्कर्ष बैठकले निर्णय गरेको उपाध्यक्ष ज्वालाले बताए ।
उनले भने, ‘संसद अधिवेशनको संघारमा संसदलाई छलेर सरकारले विभिन्न अध्यादेशहरु जारी गरेको छ, संसदीय समितिमा छलफल भइरहेको विधेयकसमेत फिर्ता नलिई सरकारले संविधान, ऐन कानून, संसद नियमावली र स्थापित अभ्यासहरूसमेत मिचेर विद्येयक ल्याउनु प्रक्रियागत रुपमा नै गलत छ, अध्यादेशका अन्तरवस्तु पनि गलत र हानिकारक छन् ।’
अध्यादेशहरूबाट भू–माफिया, कालोबजारिया, राजस्व छली गर्ने व्यक्ति, बिचौलिया, भ्रष्टाचारी, तस्कर र दलालहरूलाई फाइदा पुग्ने निषर्ष निकालेको उनले बताए । उनले थपे, ‘अध्यादेशको प्रक्रिया र अन्तरवस्तु दुबैमा हाम्रो पार्टीको असहमति र विरोध छ । त्यसैले हाम्रो पार्टीले संसदमा अध्यादेशहरूको विपक्षमा मतदान गर्ने निर्णय गरेको छ ।’
